गडचिरोली, प्रतिनिधी :-
गडचिरोली जिल्ह्यातील एटापल्ली तालुक्यातील पूरसलगोंदी ग्रामपंचायत अंतर्गत येणाऱ्या हालूर गावातील ग्रामस्थांनी एकमुखाने गावात दारूबंदीचा ठराव मंजूर केला असून यामध्ये विशेषतः महिलांनी पुढाकार घेतला आहे.
व्यसनमुक्तीच्या क्षेत्रात काम करणाऱ्या लॉईड्स इन्फिनिट फाउंडेशन (एलआयएफ) च्या प्रेरणा व पाठिंब्याने गावातील महिलांनी दारू सेवनामुळे निर्माण होणाऱ्या कौटुंबिक वाद, आरोग्य समस्या, आर्थिक अस्थिरता व अपघातासारख्या संकटांविरुद्ध ठाम भूमिका घेतली. महिलांच्या या सामूहिक निर्णयाला संपूर्ण ग्रामस्थांचा उत्स्फूर्त पाठिंबा लाभला आहे.
ग्रामस्थांचा विश्वास आहे की या सकारात्मक पावलामुळे गावातील समग्र विकासाला चालना मिळेल, आरोग्य सुधारेल आणि सामाजिक सौहार्द वृद्धिंगत होईल. दारूमुक्त गावाच्या दिशेने झालेला हा ऐतिहासिक निर्णय ग्रामविकासासाठी महत्त्वपूर्ण ठरणार असून प्रगतीशील आणि समृद्ध समाजनिर्मितीच्या दिशेने एक प्रेरणादायी उदाहरण ठरेल.
या मोहिमेत गावातील सरपंच श्रीमती अरुणाताई मधुकर सडमेक, पाटील लच्चू हेडाऊ, भूमिया धनसू होडे, महिला मंडळ अध्यक्षा कलावती तिरकी, उपाध्यक्षा फुलसिना एक्का, सचिव बाली हेडो यांच्यासह अनेक महिला ग्रामस्थांनी पुढाकार घेतला.
ग्राम संपर्क केंद्राचे कर्मचारी किशोर गावडे यांनीही महत्त्वपूर्ण भूमिका बजावली.
हालूरच्या महिला व ग्रामस्थांच्या सामूहिक भावनेने आणि दृढनिश्चयाने घडवून आणलेला हा परिवर्तनकारी बदल ग्रामीण समाजासाठी प्रेरणादायी ठरत आहे. एलआयएफ व्यसनमुक्ती उपक्रमांबाबत पुढील काळातही ग्रामस्थांना प्रेरित व पाठिंबा देत राहणार आहे.
