माओवादमुक्त गडचिरोलीत पोलिसांची अनोखी दिवाळी; ७० पोलीस केंद्रांवर नागरिकांसोबत सण साजरा

गडचिरोली, प्रतिनिधी :-

माओवादाच्या दहशतीतून मुक्त झालेल्या गडचिरोली जिल्ह्यात यंदाची दिवाळी सामाजिक सलोखा, विश्वास आणि विकासाचा संदेश देणारी ठरली. गडचिरोली पोलीस दलाच्या वतीने जिल्ह्यातील एकूण ७० पोलीस ठाणे, उपपोलीस ठाणे आणि पोलीस मदत केंद्रांमध्ये नागरिकांसोबत ‘माओवादमुक्त दिवाळी’ साजरी करण्यात आली. विशेष म्हणजे, पोलीस अधीक्षक एम. रमेश यांनी अतिदुर्गम बिनागुंडा येथे जाऊन नागरिक व पोलीस जवानांसोबत दिवाळीचा आनंद साजरा केला.

मे २०२६ मध्ये राबविण्यात आलेल्या ‘ऑपरेशन अंतिम प्रहार’च्या माध्यमातून जिल्ह्यातील माओवाद संपुष्टात आल्याच्या पार्श्वभूमीवर पोलीस दलाकडून शांतता, सुरक्षितता आणि विकासाला चालना देण्यासाठी विविध लोकाभिमुख उपक्रम राबविले जात आहेत. याच सामाजिक बांधिलकीतून ८ नोव्हेंबर रोजी पोलीस अधीक्षक एम. रमेश यांच्या मार्गदर्शनाखाली हा उपक्रम आयोजित करण्यात आला.

दुर्गम भागात वरिष्ठ अधिकाऱ्यांची नागरिकांसोबत दिवाळी

या उपक्रमांतर्गत पोलीस अधीक्षक एम. रमेश यांनी पोलीस मदत केंद्र बिनागुंडा येथे भेट देऊन तेथील नागरिक आणि जवानांसोबत दिवाळी साजरी केली. अपर पोलीस अधीक्षक (अभियान) कार्तिक मधीरा यांनी गर्देवाडा, अपर पोलीस अधीक्षक (प्रशासन) गोकुल राज जी. यांनी उपपोलीस ठाणे पेंढरी, तर अपर पोलीस अधीक्षक अहेरी हर्षवर्धन बी. जे. यांनी उपपोलीस ठाणे जिमलगट्टा येथे नागरिकांसोबत दिवाळीचा आनंद घेतला.

जिल्ह्यातील सर्व ७० पोलीस ठाणे, उपपोलीस ठाणे आणि पोलीस मदत केंद्रांमध्ये संबंधित उपविभागीय पोलीस अधिकारी व प्रभारी अधिकाऱ्यांच्या माध्यमातून दुर्गम भागातील नागरिकांना मिठाई आणि फटाक्यांचे वाटप करण्यात आले.

आत्मसमर्पित माओवादी सदस्यांसोबतही दिवाळीचा आनंद

हिंसक माओवादी विचारसरणीचा त्याग करून शांतता आणि विकासाचा मार्ग स्वीकारलेल्या आत्मसमर्पित सदस्यांनाही या उपक्रमात सहभागी करून घेण्यात आले. गडचिरोली येथील नवजीवन वसाहतीत वरिष्ठ पोलीस अधिकाऱ्यांच्या उपस्थितीत आत्मसमर्पित सदस्यांना मिठाई व फटाक्यांचे वाटप करण्यात आले. त्यांच्यासोबत फराळाचा आस्वाद घेत पोलिसांनी आपलेपणा आणि विश्वासाचे नाते दृढ करण्याचा प्रयत्न केला. समाजाच्या मुख्य प्रवाहात सन्मानाने जीवन जगण्यासाठी त्यांना प्रोत्साहन देण्याचा या उपक्रमामागील उद्देश होता.

दुष्काळग्रस्त शेतकरी कुटुंबांनाही दिवाळीची भेट

दुर्गम भागातील प्रतिकूल परिस्थितीत शेती करणाऱ्या शेतकरी बांधवांची दिवाळी आनंददायी व्हावी, यासाठी अन्नधान्य आणि फराळ वाटपाचा उपक्रम राबविण्यात आला. गडचिरोली पोलीस दल, पोलीस दादालोरा खिडकी आणि प्रोजेक्ट कृषी समृद्धी यांच्या समन्वयातून सेवा मित्र मंडळ व आदर्श मित्र मंडळ, पुणे यांच्या सहकार्याने हा उपक्रम पार पडला. त्यामुळे गरजू शेतकरी कुटुंबांनाही सणासुदीच्या काळात मदतीचा हात मिळाला.

सुरक्षेसोबत विश्वास आणि विकासावर भर

“माओवादमुक्त गडचिरोलीच्या वाटचालीत केवळ सुरक्षा व कायदा-सुव्यवस्थाच नव्हे, तर सामाजिक सलोखा, लोकसहभाग, विश्वास आणि विकास यांनाही तितकेच महत्त्व आहे. पोलीस दल आणि नागरिक यांच्यातील विश्वासाचे नाते अधिक दृढ करून शांततामय, सुरक्षित व विकसित गडचिरोली घडविण्यासाठी असे लोकाभिमुख उपक्रम यापुढेही सातत्याने राबविण्यात येतील,” असे पोलीस अधीक्षक एम. रमेश यांनी सांगितले.

पोलीस अधीक्षकांच्या आदेशाने व मार्गदर्शनाखाली अपर पोलीस अधीक्षक कार्तिक मधीरा, गोकुल राज जी., हर्षवर्धन बी. जे., सर्व उपविभागीय पोलीस अधिकारी, पोलीस ठाणे व मदत केंद्रांचे प्रभारी अधिकारी, दुय्यम अधिकारी आणि पोलीस अंमलदारांनी या उपक्रमाच्या यशस्वितेसाठी सहभाग घेतला.

माओवादविरोधी अभियानाच्या पलीकडे जाऊन दुर्गम भागातील नागरिक, आत्मसमर्पित सदस्य आणि शेतकरी कुटुंबांसोबत दिवाळी साजरी करत गडचिरोली पोलीस दलाने सुरक्षिततेसोबत सामाजिक विश्वास आणि विकासाचा संदेश दिला.