चंद्रकांत पतरंगे यांची अखिल भारतीय ग्राहक पंचायतच्या विदर्भ प्रांत सदस्यपदी निवड

गडचिरोली,प्रतिनिधी:- 

महाराष्ट्राच्या सर्वात शेवटच्या टोकाला असलेल्या, नक्षलग्रस्त व आदिवासी बहुल गडचिरोली जिल्ह्यातील सामाजिक कार्यकर्ते आणि ग्राहक पंचायतचे जिल्हाध्यक्ष चंद्रकांत पतरंगे यांची अखिल भारतीय ग्राहक पंचायतच्या विदर्भ प्रांत सदस्यपदी निवड झाल्याने जिल्ह्याच्या शिरपेचात एक मानाचा तुरा खोवला गेला आहे. ही निवड केवळ वैयक्तिक सन्मान नसून, दुर्गम व उपेक्षित भागातील जनतेचा आवाज आता प्रांत पातळीवर पोहचणार आहे, असे मानले जात आहे.

ग्राहक हक्क, स्वदेशी विचारसरणी आणि सामाजिक जनजागृतीसाठी कार्यरत असलेल्या अखिल भारतीय ग्राहक पंचायत या राष्ट्रव्यापी संघटनेने पतरंगे यांना ही जबाबदारी सोपवली आहे. त्यांच्या अनुभवसंपन्न आणि लोकाभिमुख नेतृत्वामुळे विदर्भातील ग्राहक आंदोलनाला नवी दिशा मिळणार आहे.

नुकताच  आयोजित सन्मान समारंभात पतरंगे यांचा पुष्पगुच्छ देऊन सत्कार करण्यात आला. कार्यक्रमाचे सूत्रसंचालन जिल्हा सचिव  उदय धकाते यांनी केले. यावेळी विजय कोतपल्लीवार, विजय साळवे, तुलाराम नेताम यांच्यासह अनेक मान्यवर उपस्थित होते.

या कार्यक्रमात संजय आयलवार (भंडारा) यांची पर्यावरण प्रमुख – विदर्भ प्रांत म्हणून झालेल्या निवडीचा देखील गौरव करण्यात आला. त्यांनी पर्यावरणविषयक चिंतनशील मार्गदर्शन करून उपस्थितांना जागरूकतेचा संदेश दिला. शेवटी  अरुण पोगडे यांनी आभारप्रदर्शन केले.

दुर्गम भागातून नेतृत्वाची उभारणी – एक प्रेरणादायी घटना

नक्षलग्रस्त, आदिवासी बहुल आणि विकासाच्या मुख्य प्रवाहापासून दूर असलेल्या गडचिरोली जिल्ह्यातून प्रांत स्तरावर प्रतिनिधित्व मिळणे ही बाब केवळ सन्मानाचीच नाही, तर नव्या सामाजिक दिशा देणारी आहे. चंद्रकांत पतरंगे यांनी आपल्या कार्यातून ग्रामीण भागात ग्राहक हक्क, स्वदेशी उत्पादनांचे महत्त्व आणि शासकीय योजनांची पारदर्शक अंमलबजावणी यासाठी सातत्याने काम केले आहे.

ग्रामीण जनतेसाठी नव्या आशेची किरण

पाणी, स्वच्छता, रस्ते, शासकीय योजना, माहिती अधिकार यामध्ये पारदर्शकता यावी यासाठी ग्राहक पंचायत प्रयत्नशील आहे. पतरंगे यांच्या नियुक्तीमुळे या मोहिमा आता अधिक जोमाने आणि प्रभावीपणे राबवल्या जातील. ग्रामस्तरापासून प्रांतस्तरापर्यंत जनतेचा आवाज पोहचविण्याचे सामर्थ्य त्यांच्या नेतृत्वात आहे.

संघटनेला नवे बळ – विदर्भात ठसा उमटविणाऱ्या नेतृत्वाची भर

चंद्रकांत पतरंगे यांचे सामाजिक भान, स्पष्ट विचारसरणी आणि सक्रिय सहभाग हे अखिल भारतीय ग्राहक पंचायतच्या कार्याला विदर्भात नवा आत्मा आणि गती देईल, असा विश्वास सर्वच स्तरातून व्यक्त होत आहे. गडचिरोलीसारख्या भागातून प्रांत पातळीवर नियुक्ती होणे हे ग्रामीण आणि आदिवासी जनतेच्या विश्वासाचे प्रतिनिधित्व करणारे ठरत आहे.