कार्तिक स्वामी महाराजांच्या नावाचा गैरवापर केल्याचा आरोप फेटाळला

गडचिरोली, प्रतिनिधी :-

चपराळा येथील श्री हनुमान मंदिर प्रशांत धाम ट्रस्टने उपस्थित केलेल्या विविध आक्षेपांवर श्री संत मुलीधर धाम कार्तिक स्वामी हनुमान मंदिर देवस्थान, हरनघाट (पारडी) संचालन समितीने सोमवारी पत्रकार परिषद घेऊन आपली भूमिका स्पष्ट केली.

गडचिरोली ऑल मीडिया असोसिएशन च्या पत्रकार परिषदेत समितीचे अध्यक्ष संत मुलीधर महाराज विठ्ठलवार गुज्जनवार यांनी कार्तिक स्वामी महाराजांच्या नावाचा किंवा छायाचित्राचा वापर करून देणग्या गोळा केल्याचे आरोप फेटाळून लावले.

समितीच्या वतीने सांगण्यात आले की, कार्तिक स्वामी महाराजांच्या नावाचा प्रसिद्धीसाठी अथवा आर्थिक लाभासाठी कधीही वापर करण्यात आलेला नाही. पावती पुस्तकांवर त्यांचे छायाचित्र छापल्याचा आरोपही निराधार असल्याचा दावा करण्यात आला. या संदर्भातील कोणताही पुरावा असल्यास तो सार्वजनिकरित्या सादर करावा, असे आव्हान समितीने केले.

गुरू-शिष्य परंपरेविषयी बोलताना संत मुलीधर महाराज यांनी कार्तिक स्वामी महाराजांना आपण गुरू मानत असल्याचे सांगितले. हिंदू धर्मपरंपरेनुसार कोणालाही गुरू मानण्याचा अधिकार प्रत्येकाला असल्याने या विषयावर आक्षेप घेण्याचे कारण नसल्याचे त्यांनी नमूद केले.

हरनघाट ते चपराळा पालखी परंपरेबाबत समितीने सांगितले की, कार्तिक स्वामी महाराजांच्या निधनानंतर भक्तांच्या स्वयंप्रेरणेने ही परंपरा सुरू झाली. पालखीमधून प्राप्त होणाऱ्या देणग्या व धान्य संबंधित ट्रस्टकडे नियमितपणे सुपूर्द करण्यात येत असून त्याचा लेखाजोखा उपलब्ध असल्याचा दावा समितीने केला.

सोशल मीडियावर आणि काही वृत्तवाहिन्यांमध्ये चर्चेत आलेल्या विभूती प्रकरणाबाबतही समितीने स्पष्टीकरण दिले. या प्रकरणाशी कार्तिक स्वामी महाराज किंवा चपराळा संस्थानचा कोणताही संबंध नसल्याचे सांगण्यात आले. अपूर्ण किंवा चुकीच्या माहितीतून गैरसमज निर्माण झाल्याचा आरोप समितीने केला.

पत्रकार परिषदेला उपाध्यक्ष लच्छय्या मलय्या गद्देवार, सचिव सुभाष नागुलवार, सहसचिव अनिल कांमडी, कोषाध्यक्ष मुकेश गुरनुले यांच्यासह समितीचे इतर पदाधिकारी व सदस्य उपस्थित होते.

चपराळा ट्रस्टने केलेले आरोप बिनबुडाचे आणि तथ्यहीन असल्याचा दावा संचालन समितीने केला. तसेच या संदर्भातील खुलाशाच्या प्रती धर्मादाय आयुक्त, गडचिरोली तसेच सावली आणि आष्टी येथील पोलीस अधिकाऱ्यांना पाठविण्यात आल्याची माहितीही यावेळी देण्यात आली.