शिक्षक व शिक्षकेत्तर कर्मचाऱ्यांच्या प्रलंबित प्रश्नांवर आमदार सुधाकर अडबले यांची मुख्य कार्यकारी अधिकाऱ्यांसोबत चर्चा

गडचिरोली, प्रतिनिधी :-

आमदार सुधाकर अडबले यांनी जिल्हा दौऱ्यादरम्यान जिल्हा परिषद गडचिरोली चे मुख्य कार्यकारी अधिकारी यांची सदिच्छा भेट घेऊन जिल्ह्यातील प्राथमिक, माध्यमिक शिक्षक तसेच शिक्षकेत्तर कर्मचाऱ्यांच्या विविध प्रलंबित प्रश्नांबाबत सविस्तर चर्चा केली.

बैठकीत जिल्ह्यातील काही गावांमध्ये जिल्हा परिषद उच्च प्राथमिक शाळांना वर्गवाढीची परवानगी देण्याच्या प्रक्रियेबाबत चिंता व्यक्त करण्यात आली. विशेषतः ज्या ठिकाणी आधीपासून खासगी अनुदानित शाळा कार्यरत आहेत, त्या परिसरात नव्याने जिल्हा परिषद शाळांना वर्गवाढ देण्यात येऊ नये, अशी मागणी आमदार अडबले यांनी केली.

याशिवाय समायोजन झालेल्या शाळांमधील शिक्षक व कर्मचाऱ्यांना रुजू करून न घेणाऱ्या संस्थांवर नियमानुसार कारवाई करण्यात यावी तसेच आवश्यक असल्यास मान्यता रद्द करण्याची प्रक्रिया राबविण्यात यावी, अशी मागणीही यावेळी करण्यात आली. शिक्षक व शिक्षकेत्तर कर्मचाऱ्यांच्या विविध प्रशासकीय व सेवा विषयक समस्यांवर सकारात्मक चर्चा झाल्याची माहिती देण्यात आली.

या बैठकीस शिक्षणाधिकारी (माध्यमिक) वासुदेव भुसे, शिक्षणाधिकारी (प्राथमिक) बाबासाहेब पवार, विदर्भ माध्यमिक शिक्षक संघ चे जिल्हा कार्यवाह अजय लोंढे, जिल्हाध्यक्ष रवींद्र नैताम, माजी प्राचार्य शमशेर खान पठाण यांच्यासह मनोज निंबार्ते, नरेंद्र भोयर, जयंत येलमुले, अर्जुनकर सर आणि इतर कर्मचारी उपस्थित होते.

शिक्षक व शिक्षकेत्तर कर्मचाऱ्यांच्या प्रलंबित प्रश्नांवर लवकरात लवकर सकारात्मक निर्णय घेण्यासाठी प्रशासनाने आवश्यक कार्यवाही करावी, अशी अपेक्षा यावेळी व्यक्त करण्यात आली.