देसाईगंज, प्रतिनिधी :-
मुख्यमंत्री देवेंद्र फडणवीस, राष्ट्रवादी काँग्रेसचे ज्येष्ठ नेते खासदार प्रफुल्ल पटेल आणि प्रदेशाध्यक्ष सुनील तटकरे यांच्याविरोधात आमदार रोहित पवार यांनी पत्रकार परिषदेत केलेल्या कथित आक्षेपार्ह वक्तव्यांचा व आरोपांचा निषेध करण्यासाठी राष्ट्रवादी काँग्रेस पार्टी (अजित पवार गट), गडचिरोली जिल्ह्याच्या देसाईगंज तालुका शाखेच्या वतीने जाहीर निषेध आंदोलन करण्यात आले. यावेळी रोहित पवार यांच्या प्रतिकात्मक पुतळ्याला जोडे मारून त्याचे दहन करण्यात आले. कार्यकर्त्यांनी जोरदार घोषणाबाजी करीत निषेध व्यक्त केला.
या आंदोलनाचे नेतृत्व राष्ट्रवादी काँग्रेसचे जिल्हाध्यक्ष रवींद्रभाऊ वासेकर यांनी केले. त्यांच्या नेतृत्वाखाली जिल्हा व तालुका स्तरावरील पदाधिकारी, युवक व महिला आघाडीचे प्रतिनिधी आणि कार्यकर्ते मोठ्या संख्येने सहभागी झाले. पक्षाच्या वरिष्ठ नेत्यांविरोधात करण्यात आलेल्या वक्तव्यांबाबत कार्यकर्त्यांनी तीव्र नाराजी व्यक्त केली.
सार्वजनिक जीवनात राजकीय आरोप करताना वस्तुस्थिती, पुरावे आणि जबाबदारीचे भान ठेवणे आवश्यक आहे. केवळ आरोप-प्रत्यारोप करून राजकीय वातावरण तापविण्याऐवजी प्रत्येक वक्तव्याला तथ्यांचा आधार असावा, अशी भूमिका आंदोलनकर्त्या पदाधिकाऱ्यांनी मांडली.
रवींद्रभाऊ वासेकर यांच्या नेतृत्वात संघटनेची एकजूट
जिल्हाध्यक्ष रवींद्रभाऊ वासेकर यांच्या नेतृत्वाखाली जिल्ह्यातील विविध आघाड्यांचे पदाधिकारी आणि कार्यकर्ते एकत्र आल्याने आंदोलनाला संघटनात्मक स्वरूप प्राप्त झाले. पक्षाच्या वरिष्ठ नेतृत्वाच्या समर्थनार्थ कार्यकर्त्यांनी एकजुटीने आपली भूमिका मांडली. युवक आघाडी, महिला आघाडी आणि तालुका स्तरावरील पदाधिकाऱ्यांचा सहभाग यावेळी लक्षवेधी ठरला.
पदाधिकारी व कार्यकर्त्यांची उपस्थिती
यावेळी कार्यकारी जिल्हाध्यक्ष नंदूभाऊ नरोटे, प्रदेश उपाध्यक्ष नानाभाऊ नाकाडे, राष्ट्रवादी युवक काँग्रेसचे जिल्हाध्यक्ष लीलाधर भरडकर, तालुकाध्यक्ष तथा सभापती पिंकूभाऊ बावणे, आरमोरी विधानसभा निरीक्षक प्रा. रिंकू पापडकर, गडचिरोलीचे माजी नगराध्यक्ष वैद्य साहेब, देविदास कापकर, आदिवासी आघाडीचे तालुकाध्यक्ष महादेव कुंबरे, लतीफभाई शेख, रियाजुल शेख, विजय धकाते, बी.टी. सेलोकर, सुनील नंदनवार, कार्यकारी तालुकाध्यक्ष गीताबाई नाकाडे, प्रमोद दोनाडकर, सुनील चिंचोळकर, अमित सलामे, मयूर नागलवाडे, महिला शहराध्यक्ष पूनम कोल्हे, अशोक देशमुख, विष्णू गराडे, देजस मरसकोल्हे, गोपाल निमजे, स्वप्नील नागापुरे, अनिल उदासी, आर्यन सहारे, नाशिक नागपुरे आणि अभित बन्सोड यांच्यासह विविध आघाड्यांचे पदाधिकारी व कार्यकर्ते मोठ्या संख्येने उपस्थित होते.
देसाईगंज येथे झालेल्या या आंदोलनातून राष्ट्रवादी काँग्रेस (अजित पवार गट) यांनी वरिष्ठ नेतृत्वाच्या समर्थनार्थ आपली भूमिका स्पष्ट केली. जोडे मारो आंदोलन आणि पुतळा दहनाद्वारे आमदार रोहित पवार यांच्या वक्तव्यांचा जाहीर निषेध करण्यात आला. या आंदोलनाची देसाईगंजच्या राजकीय वर्तुळात चर्चा सुरू झाली आहे.
Back to top button