१४ आत्मसमर्पित माओवाद्यांना भूखंडांचे वाटप

गडचिरोली, प्रतिनिधी :-

हिंसाचाराचा मार्ग सोडून समाजाच्या मुख्य प्रवाहात सहभागी होण्याचा निर्णय घेतलेल्या आत्मसमर्पित माओवादी सदस्यांच्या पुनर्वसनाला गडचिरोली पोलीस दलाने आणखी गती दिली आहे. ‘प्रोजेक्ट संजीवनी’अंतर्गत मंगळवारी (दि. १ सप्टेंबर) १४ आत्मसमर्पित माओवादी सदस्यांना भूखंडांचे वितरण करण्यात आले. यासोबतच पुनर्वसन निधीचे धनादेश, मुलांना सायकल व शैक्षणिक साहित्य तसेच वाहनचालक परवान्यांचेही वितरण करण्यात आले.

गडचिरोली पोलीस दलाच्या प्रयत्नांमुळे आतापर्यंत ८१९ माओवाद्यांनी आत्मसमर्पण केले आहे. महाराष्ट्र शासनाच्या आत्मसमर्पण व पुनर्वसन योजनेअंतर्गत आत्मसमर्पित सदस्यांना समाजाच्या मुख्य प्रवाहात आणण्यासाठी भूखंड, घरकुल, रोजगार, आरोग्य, शिक्षण आणि स्वयंरोजगाराच्या माध्यमातून मदत केली जात आहे.

जिल्हा प्रशासन आणि गडचिरोली पोलीस दलाच्या समन्वयातून आत्मसमर्पित माओवादी सदस्यांसाठी आतापर्यंत १७४ भूखंड मंजूर झाले असून, त्यापैकी १५३ भूखंडांचे यापूर्वी वितरण करण्यात आले आहे. मंगळवारी झालेल्या कार्यक्रमात आणखी १४ जणांना भूखंडाचे प्रमाणपत्र प्रदान करण्यात आले.

पुनर्वसन निधीसह विविध साहित्यांचे वाटप

कार्यक्रमात आत्मसमर्पित सदस्यांना केंद्र व राज्य शासनाकडून पुनर्वसनासाठी मिळणाऱ्या निधीचे धनादेश देण्यात आले. त्यांच्या मुलांना सायकल व शैक्षणिक साहित्याचे वाटप करण्यात आले. तसेच काही आत्मसमर्पित सदस्यांना वाहनचालक परवान्यांचे वितरण करण्यात आले.

स्वावलंबी जीवन जगण्याचे आवाहन

जिल्हाधिकारी अविश्यांत पंडा यांनी आत्मसमर्पित सदस्यांनी शासनाच्या विविध पुनर्वसन योजनांचा लाभ घेऊन समाजाच्या मुख्य प्रवाहात सहभागी व्हावे, असे आवाहन केले. स्वावलंबी जीवन जगण्यासाठी राज्य शासनाकडून आवश्यक ते सर्व सहकार्य करण्यात येईल. आत्मसमर्पित सदस्यांच्या सर्वांगीण विकासासाठी शासन कटिबद्ध असल्याचे त्यांनी सांगितले.

गडचिरोली पोलीस दलाकडून रोजगार, शिक्षण, आरोग्य, कृषी आणि स्वयंरोजगाराशी संबंधित विविध सुविधा उपलब्ध करून दिल्या जात आहेत. या संधींचा लाभ घेऊन आत्मसमर्पित सदस्यांनी समाजात सन्मानाने जीवन जगावे, असे आवाहनही करण्यात आले.

पोलीस अधीक्षक एम. रमेश यांनी हिंसाचाराचा मार्ग सोडून शांतता, विकास आणि प्रगतीचा मार्ग स्वीकारलेल्या आत्मसमर्पित माओवादी सदस्यांचे कौतुक केले. नव्या आयुष्याची सुरुवात करून उज्ज्वल भवितव्य घडवावे, अशा शुभेच्छा त्यांनी दिल्या.

कार्यक्रमाला जिल्हाधिकारी अविश्यांत पंडा, पोलीस अधीक्षक एम. रमेश, अपर पोलीस अधीक्षक (प्रशासन) गोकुल राज जी, सहाय्यक जिल्हाधिकारी अरुण एम., सहाय्यक जिल्हाधिकारी अजय डोके आणि पोलीस उपअधीक्षक (अभियान) सुनील उईके उपस्थित होते.

कार्यक्रमाच्या यशस्वितेसाठी आत्मसमर्पण शाखेचे प्रभारी अधिकारी पोलीस उपनिरीक्षक नरेंद्र पिवाल, महिला पोलीस उपनिरीक्षक प्रतिक्षा राठोड तसेच पोलीस अंमलदारांनी परिश्रम घेतले.