कुरखेड्यात सफाई कामगारांचे आंदोलन पेटले,’टाळे ठोको’चा इशारा!

कुरखेडा, प्रतिनिधी :-

कुरखेडा नगर पंचायतीच्या मनमानी कारभाराविरोधात आणि थकीत वेतनाच्या मागणीसाठी सफाई कामगारांनी पुकारलेले बेमुदत आंदोलन आता अधिक तीव्र झाले आहे. २३ एप्रिलपासून सुरू असलेल्या या आंदोलनाला सात दिवस उलटूनही प्रशासनाने कोणतीही दखल न घेतल्याने सर्वपक्षीय संताप उफाळून आला आहे. दोन दिवसांत तोडगा न निघाल्यास नगर पंचायतीला ‘टाळे ठोको’ आंदोलन करण्याचा इशारा देण्यात आला आहे.

​प्रशासकीय ‘घोटाळा’ उघड: नेत्यांनी धरले धारेवर

​आज आझाद समाज पक्ष, मार्क्सवादी कम्युनिस्ट पक्ष (माकपा) आणि आम आदमी पक्षाच्या (आप) नेत्यांनी नगर पंचायतीवर धडक देत प्रशासनाला जाब विचारला. यावेळी धक्कादायक बाबी समोर आल्या आहेत:

​टेंडर प्रक्रियेत घोळ: सफाई कामगारांची नियुक्ती करताना कोणतीही अधिकृत टेंडर प्रक्रिया राबविण्यात आली नाही.

​कमी मानधनाचे शोषण: कामगारांना कायद्यानुसार किमान वेतन देण्याऐवजी, त्यांना बळजबरीने बचत गटांत समाविष्ट करून अत्यल्प मानधन दिले जात असल्याचे उघड झाले आहे.

​भविष्य निर्वाह निधीचा पत्ता नाही: टेंडर प्रक्रिया नसल्याने कामगारांचा EPFO (भविष्य निर्वाह निधी) जमा होत नसल्याचा गंभीर आरोप नेत्यांनी केला आहे.

​मुख्याधिकाऱ्यांची उदासीनता; सात दिवसांपासून भेटही नाही!

​आंदोलनकर्त्या कामगारांचे मागील दोन महिन्यांचे वेतन थकीत आहे. असे असतानाही नगर पंचायत मुख्याधिकाऱ्यांनी गेल्या सात दिवसात आंदोलनकर्त्यांची भेट घेतलेली नाही. अधिकारी आणि पदाधिकारी फोन उचलत नसल्याने कामगारांमध्ये प्रचंड रोष आहे.

​आझाद समाज पक्षाचे जिल्हाध्यक्ष राज बन्सोड, माकपा जिल्हा सचिव कॉ. अमोल मारकवार आणि आप जिल्हाध्यक्ष नासिर हाश्मी यांनी स्पष्ट केले की, हे संपूर्ण प्रकरण बेकायदेशीर असून कामगारांच्या हक्कांवर गदा आणणारे आहे.

​दोषी अधिकाऱ्यांच्या निलंबनाची मागणी

​या संपूर्ण टेंडर प्रक्रियेची उच्चस्तरीय चौकशी करून दोषी अधिकाऱ्यांवर कारवाई करावी आणि संबंधित सीईओ व जबाबदार अधिकाऱ्यांना तत्काळ निलंबित करावे, अशी ठाम मागणी करण्यात आली आहे. पुढील ४८ तासांत तोडगा न निघाल्यास कुरखेडा नगर पंचायतीला टाळे ठोकून आंदोलन अधिक तीव्र करण्याचा इशारा देण्यात आला आहे.