गडचिरोली, प्रतिनिधी :-
महाराष्ट्र राज्यातील स्थानिक स्वराज्य संस्थांच्या आगामी निवडणुकांच्या पार्श्वभूमीवर आज राज्यातील १४७ नगरपरिषदां आणि २४७ नगरपंचायतींच्या नगराध्यक्ष पदांसाठी आरक्षण सोडत जाहीर करण्यात आली.
या सोडतीत गडचिरोली नगरपरिषद अध्यक्षपद “खुला महिला प्रवर्गासाठी” राखीव जाहीर करण्यात आले आहे. या निकालानंतर शहरातील निवडणूक वातावरणात मोठी चर्चा रंगली आहे. बरेच पुरुष इच्छुक उमेदवार बाशिंग बांधून तयारीस लागलेले असताना, या आरक्षण सोडतीने त्यांचा हिरमोड झाला आहे.
गडचिरोली येथे कोणते आरक्षण निघते, याकडे सर्वांचे लक्ष लागले होते. अखेर निकाल जाहीर होताच स्पष्ट झाले की, गडचिरोलीत पुन्हा एकदा महिला राज राहणार आहे. मागील दहा वर्षांपासून महिला नगराध्यक्षा पदावर विराजमान होत असून, पुढील पाच वर्षेही महिलांचेच नेतृत्व राहणार आहे.
ही सोडत नगर विकास राज्यमंत्री यांच्या अध्यक्षतेखाली पार पडली. विविध प्रवर्गांसाठी — अनुसूचित जाती, अनुसूचित जमाती, इतर मागास प्रवर्ग आणि महिला — यांचे आरक्षण निश्चित करण्यात आले आहे. संपूर्ण राज्यातील नगरपरिषद व नगरपंचायतींच्या नगराध्यक्षपदांचे आरक्षण आज जाहीर करण्यात आले असून, त्याची अधिकृत यादी शासनाच्या संकेतस्थळावर प्रसिद्ध करण्यात आली आहे.
महाभारत न्यूज चे वाचकांना आवाहन
