गडचिरोली, प्रतिनिधी :-
शहरातील लांझेडा परिसरात उधारीच्या पैशांच्या वादातून एका युवकाची भरदिवसा हत्या झाल्याची धक्कादायक घटना सोमवारी दुपारी सुमारे पाच वाजताच्या सुमारास उघडकीस आली. या घटनेमुळे संपूर्ण शहरात खळबळ उडाली असून जिल्हा मुख्यालयातच घडलेल्या या प्रकारामुळे कायदा-सुव्यवस्थेबाबत प्रश्न उपस्थित केले जात आहेत.
या घटनेत सचिन कुडुलवार (रा. विवेकानंदनगर, गडचिरोली) असे मृत्यू झालेल्या युवकाचे नाव असल्याची माहिती मिळाली आहे. मिळालेल्या माहितीनुसार, लांझेडा परिसरातील काही आरोपी फर्निचरचे काम करतात. मृतक सचिन कुडुलवार यांनी त्यांना काही रक्कम उधारीने दिली होती.
उधारीचे पैसे परत मागितल्यानंतर आरोपींनी ते एक-दोन दिवसांत देण्याचे सांगून सचिन यांना आज पैसे घेण्यासाठी बोलाविले होते. पैसे घेण्यासाठी ते तेथे गेले असता त्यांच्यावर हल्ला करून हत्या केल्याची प्राथमिक माहिती समोर येत आहे.
घटनेची माहिती मिळताच गडचिरोली पोलिसांनी तातडीने घटनास्थळी धाव घेत मृतदेह ताब्यात घेऊन पंचनामा केला असून पुढील तपास सुरू केला आहे.
भरदिवसा युवकाची हत्या झाल्याने शहरात भीतीचे वातावरण निर्माण झाले असून पोलिसांकडून आरोपींचा शोध सुरू आहे. या प्रकरणाचा पुढील तपास गडचिरोली पोलिस करीत आहेत.
