गडचिरोली,प्रतिनिधी :-
गडचिरोली जिल्ह्याच्या औद्योगिक आणि सामाजिक विकासात लॉयड्स मेटल्स अँड एनर्जी लिमिटेडने (LMEL) आज एक ऐतिहासिक पाऊल टाकले आहे. कंपनीच्या लॉयड्स मिशन फॉर ग्लोबल स्किल्स अँड एंटरप्रेन्योरशिप (LMGSE) या उपक्रमांतर्गत दुसऱ्या बॅचचे प्रशिक्षण यशस्वीरित्या पूर्ण झाले असून, २५५ विद्यार्थ्यांना तत्काळ नोकरीच्या संधी उपलब्ध करून देण्यात आल्या आहेत.
आज २६ मार्च २०२६ रोजी आयोजित करण्यात आलेल्या या दीक्षांत समारंभाला गडचिरोली जिल्हा परिषदेचे मुख्य कार्यकारी अधिकारी श्री. सुहास गाडे, लॉयड्स मेटल्सचे व्यवस्थापकीय संचालक बी. प्रभाकरन, रेसिडेंट डायरेक्टर श्री. हिम्मत सिंह, एक्झिक्युटिव डायरेक्टर श्री. एस. वेंकटेश्वरन आणि इतर मान्यवर उपस्थित होते. सीईओ सुहास गाडे यांनी लॉयड्सच्या या अभिनव उपक्रमाचे भरभरून कौतुक केले.
शिक्षणातून थेट रोजगाराकडे
२८ जानेवारी २०२६ रोजी सुरू झालेल्या या बॅचमध्ये विद्यार्थ्यांना उद्योगाभिमुख प्रशिक्षण देण्यात आले. वेल्डिंग, इलेक्ट्रिकल कामे, वेअरहाऊस ऑपरेशन्स, ड्रायव्हिंग, हॉस्पिटॅलिटी (फूड अँड बेव्हरेज, हाऊसकीपिंग) आणि रिटेल यांसारख्या विविध क्षेत्रांतील उत्कृष्टता केंद्रांद्वारे (CoEs) हे प्रशिक्षण पूर्ण झाले. प्रशिक्षण पूर्ण होताच विद्यार्थ्यांना अप्रेंटिसशिप नियुक्तीपत्रे देऊन रोजगाराची हमी देण्यात आली.
‘नवीन जमशेदपूर’ उभारणीचे स्वप्न – बी. प्रभाकरन
याप्रसंगी बोलताना व्यवस्थापकीय संचालक बी. प्रभाकरन यांनी लॉयड्सची व्हिजन मांडली. ते म्हणाले, “आमचे उद्दिष्ट केवळ औद्योगिक विकास करणे नाही, तर स्थानिक सक्षमीकरणावर आधारित गडचिरोलीला ‘नवीन जमशेदपूर’ बनवणे आहे. लॉयड्सने आतापर्यंत २००० पेक्षा अधिक कुशल कामगार तयार केले आहेत. गडचिरोलीचा विकास हा येथील लोकांच्या विकासावरच अवलंबून आहे.”
बि. प्रभाकरण मार्गदर्शन करतांना
महत्त्वाच्या घोषणा:- महिलांसाठी प्रगत ड्रायव्हिंग स्कूल: श्री. प्रभाकरन यांनी महिलांना विविध वाहने चालवण्याचे प्रशिक्षण देण्यासाठी स्वतंत्र ड्रायव्हिंग स्कूल सुरू करण्याची घोषणा केली. यामध्ये महिलांसाठी विशेष सुविधा असलेली वाहने उपलब्ध असतील.
राज्य सरकारचे आभार: गडचिरोलीला स्टील हब बनवण्यासाठी सहकार्य केल्याबद्दल त्यांनी मुख्यमंत्री देवेंद्र फडणवीस आणि राज्य सरकारचे आभार मानले.
कार्यक्रमात विद्यार्थ्यांनी आत्मविश्वासाने इंग्रजीत संवाद साधल्याबद्दलही श्री. प्रभाकरन यांनी त्यांचे विशेष कौतुक केले. LMGSE च्या माध्यमातून लॉयड्स मेटल्स स्थानिक युवकांना कौशल्य, आत्मविश्वास आणि रोजगाराच्या संधी देत जिल्ह्याच्या समावेशक विकासासाठी आपली बांधीलकी दृढ करत आहे.
