अजय बिवडे यांना ‘अजेय लेखणी सन्मान पुरस्कार-२०२६’ जाहीर

नागपूर, प्रतिनिधी :-

नागपूर येथून प्रकाशित होणाऱ्या सिंहवाणी वृत्त या दैनिकाचे मुख्य संपादक तथा ज्येष्ठ पत्रकार अजय बिवडे यांची प्रतिष्ठेच्या ‘अजेय लेखणी सन्मान पुरस्कार-२०२६’ साठी निवड करण्यात आली आहे. पत्रकारिता क्षेत्रातील उल्लेखनीय योगदान, सामाजिक बांधिलकी आणि संपादकीय नेतृत्वाची दखल घेत त्यांना हा सन्मान जाहीर करण्यात आला आहे.

गेल्या १७ वर्षांपासून पत्रकारिता क्षेत्रात कार्यरत असलेल्या अजय बिवडे यांनी विविध वृत्तपत्रे व माध्यमांमध्ये प्रभावी कार्य केले आहे. ते भारत सरकारमान्य पीआरजीआय प्रेस असोसिएशनचे महाराष्ट्र प्रदेशाध्यक्ष म्हणून जबाबदारी सांभाळत असून, दैनिक शिवघोषचे संपादक म्हणूनही कार्यरत आहेत.

मुंबईस्थित आर्यारवी एन्टरटेन्मेंट संस्थेतर्फे दरवर्षी पत्रकार, संपादक, साहित्यिक, मुक्त पत्रकार, कलावंत आणि समाजसेवक यांच्या उल्लेखनीय कार्याचा गौरव केला जातो. यावर्षीही विविध क्षेत्रातील मान्यवरांना सन्मानित करण्यात येणार असून, त्यामध्ये अजय बिवडे यांची निवड करण्यात आली आहे.

पुरस्कार वितरण समारंभ रविवार, दि. १२ जुलै २०२६ रोजी सकाळी १० वाजता, मुंबई येथील मुंबई मराठी ग्रंथ संग्रहालयाच्या सुरेंद्र गावसकर सभागृहात आयोजित करण्यात आला आहे.

या निवडीबद्दल आर्यारवी एन्टरटेन्मेंटचे आयोजक महेश्वर तेटांबे तसेच समन्वयक गुरूनाथ तिरपणकर यांनी अजय बिवडे यांचे अभिनंदन करून त्यांच्या पुढील वाटचालीस शुभेच्छा दिल्या आहेत.

पत्रकारितेतील त्यांच्या सातत्यपूर्ण, निर्भीड आणि लोकहिताच्या कार्यामुळे हा सन्मान त्यांना प्राप्त झाला असून, त्यांच्या निवडीबद्दल पत्रकारिता क्षेत्रातून तसेच विविध सामाजिक संघटनांकडून अभिनंदनाचा वर्षाव होत आहे.