गडचिरोली, प्रतिनिधी :-
केंद्र व राज्य सरकारच्या कथित कामगार व शेतकरी विरोधी धोरणांविरोधात १२ फेब्रुवारी रोजी सीटू संघटनेच्या नेतृत्वाखाली जिल्हाधिकारी कार्यालयासमोर तीव्र आंदोलन छेडण्यात येणार आहे. या आंदोलनात जिल्ह्यातील हजारो कंत्राटी कामगार, शेतकरी व शेतमजूर मोठ्या संख्येने सहभागी होणार असल्याची माहिती समोर आली आहे.
देशव्यापी सार्वत्रिक संपाच्या पार्श्वभूमीवर देशभरातून तब्बल ३० कोटी कामगार व शेतकरी संघर्षात उतरणार असल्याचा इशारा संघटनेने दिला आहे. गडचिरोली जिल्ह्यातील कामगारांनी अन्यायाविरोधात एकजूट दाखवावी, असे आवाहन मार्क्सवादी कम्युनिस्ट पक्षाचे जिल्हा सचिव कॉ. अमोल मारकवार यांनी केले आहे.
सरकारने लागू केलेल्या चार श्रमसंहितांमुळे कामगारांचे हक्क धोक्यात आल्याचा आरोप संघटनांनी केला आहे. असंघटित कामगारांना किमान २६ हजार रुपये वेतन, ६० वर्षांवरील कामगार, शेतकरी व शेतमजुरांना दरमहा ५ हजार रुपये पेन्शन देण्याची मागणी आंदोलनातून जोरदारपणे करण्यात येणार आहे.
या आंदोलनात अंगणवाडी सेविका, आशा वर्कर, शालेय पोषण आहार कर्मचारी, अंशकालीन परिचर, कंत्राटी कामगार तसेच विविध कामगार व शेतकरी संघटना सहभागी होणार आहेत. आंदोलनाचे नेतृत्व कॉ. रमेशचंद्र दहिवडे, कॉ. जामदार, कॉ. अमोल मारकवार, डॉ. धर्मराज सोरदे व राज बन्सोड करणार आहेत.
संघटनांनी सरकारने मागण्यांकडे दुर्लक्ष केल्यास आंदोलन अधिक तीव्र करण्याचा इशाराही दिला आहे.
