कमलापूर, प्रतिनिधी :-
गडचिरोली जिल्ह्यातील वन्यजीव संरक्षणासाठी कार्यरत अग्रिम पथकांना बळकटी देण्यासाठी लॉइड्स मेटल्स अँड एनर्जी लिमिटेडतर्फे कमलापूर हत्ती छावणीत फील्ड किट्स वितरण कार्यक्रम उत्साहात पार पडला. कंपनीने आपल्या सामाजिक बांधिलकीचा पुनरुच्चार करत हा उपक्रम राबविला.
कार्यक्रमाचे उद्घाटन उपवनसंरक्षक नवकिशोर रेड्डी आणि सहाय्यक वनसंरक्षक विष्णु वर्धन रेड्डी यांच्या हस्ते करण्यात आले. यावेळी वनपरिक्षेत्र अधिकारी गौतम गाडमाडे, परिविक्षाधीन अधिकारी अनिरुष माने तसेच कमलापूर वन परिक्षेत्रातील कर्मचारी उपस्थित होते.
या उपक्रमांतर्गत कमलापूर हत्ती छावणी, वन्य म्हैस संवर्धन पथक आणि “वल्चर फ्रेंड्स” उपक्रमाशी संबंधित पथकांना फील्ड किट्सचे वितरण करण्यात आले. या किट्समुळे क्षेत्रीय कामकाज अधिक कार्यक्षम व सुरक्षित होण्यास मदत होणार आहे. वन्य म्हैस पथकाला टी-शर्ट, पायघोळ, भटकंतीसाठी बूट, टॉर्च व तंबू देण्यात आले, तर हत्ती छावणी आणि वल्चर फ्रेंड्स पथकांना टी-शर्ट, पायघोळ, बूट व टॉर्च देण्यात आले. या उपक्रमाचा लाभ एकूण ३० कर्मचाऱ्यांना झाला.
यावेळी उपवनसंरक्षक नवकिशोर रेड्डी यांनी हत्ती छावणीतील नियोजित सुधारणा तसेच अलीकडील प्रगतीची माहिती दिली. लॉइड्स मेटल्स अँड एनर्जी लिमिटेडकडून मिळणाऱ्या सातत्यपूर्ण तांत्रिक व साधनसामग्रीच्या सहाय्याबद्दल त्यांनी समाधान व्यक्त केले. या साहित्यामुळे कर्मचाऱ्यांना त्यांच्या दैनंदिन संवर्धन कार्यात मोठी मदत होणार असल्याचे त्यांनी नमूद केले.
कार्यक्रमाचा समारोप सहाय्यक वनसंरक्षक विष्णु वर्धन रेड्डी, वनपरिक्षेत्र अधिकारी गौतम गाडमाडे व परिविक्षाधीन अधिकारी अनिरुष माने यांच्या भाषणांनी झाला.
हा उपक्रम कंपनीचे व्यवस्थापकीय संचालक बी. प्रभाकरन यांच्या नेतृत्वाखाली वन्यजीव संरक्षण व अधिवास व्यवस्थापन अधिक प्रभावी करण्याच्या प्रयत्नांचे प्रतीक असल्याचे यावेळी सांगण्यात आले.
