वंचितचा गडचिरोली नगर परिषदेत बोगस शिक्षक भरतीचा आरोप

गडचिरोली, प्रतिनिधी :-

गडचिरोली नगर परिषदेतील कंत्राटी शिक्षक भरती प्रक्रियेत गंभीर अनियमितता झाल्याचा आरोप वंचित बहुजन आघाडीचे नेते नगरसेवक तथा शिक्षण समितीचे सदस्य बाळू टेंभुर्णे यांनी केला आहे. सत्ताधारी पक्षाच्या पदाधिकाऱ्यांनी मुख्याधिकाऱ्यांशी संगनमत करून नियमांना डावलत बोगस पद्धतीने शिक्षक भरती केल्याचा आरोप करत त्यांनी जिल्हाधिकारी अविश्यांत पांडा यांच्याकडे तक्रार दाखल करून संपूर्ण भरती प्रक्रिया रद्द करण्याची मागणी केली आहे.

वंचित बहुजन आघाडीचे नेते टेंभुर्णे यांनी जिल्हाधिकाऱ्यांची भेट घेऊन दिलेल्या निवेदनात नमूद केले आहे की, गडचिरोली नगर परिषदेने विविध विभागांसाठी मनुष्यबळ पुरविण्यासाठी मे. यशश्री एंटरप्रायझेस, सोलापूर या संस्थेशी २८ एप्रिल २०२६ रोजी ई-निविदेद्वारे करार केला होता. त्यानुसार नगर परिषदेच्या शाळांमध्ये कंत्राटी शिक्षक भरतीचा ठराव ३० जून २०२६ रोजी झालेल्या सर्वसाधारण सभेत मंजूर करण्यात आला.

मात्र, हा ठराव मंजूर होण्यापूर्वीच म्हणजे २९ जून २०२६ रोजी कोणतीही सार्वजनिक जाहिरात न देता आणि संबंधित एजन्सीला विश्वासात न घेता काही निवडक उमेदवारांच्या मुलाखती घेण्यात आल्याचा आरोप करण्यात आला आहे. शासनाचे निकष व नियम डावलून सत्ताधारी पदाधिकाऱ्यांनी परस्पर भरती प्रक्रिया राबविल्याचा दावा तक्रारीत करण्यात आला आहे.

टेंभुर्णे यांच्या आरोपानुसार, शिक्षक भरतीसाठी अधिकृत नियुक्तीपत्र न देता १८ उमेदवारांना शिक्षण विभागातील कर्मचाऱ्यांमार्फत तोंडी सूचना करून कामावर रुजू करण्यात आले. तसेच भरती प्रक्रियेत सहभागी झालेल्या अधिकाऱ्यांनीही कोणत्याही अधिकृत आदेशाशिवाय मुलाखती घेतल्याचा आरोप त्यांनी केला आहे.

या प्रकरणाची सखोल चौकशी करून संपूर्ण शिक्षक भरती प्रक्रिया रद्द करावी, नव्याने पारदर्शक पद्धतीने भरती करावी, तसेच संबंधित मुख्याधिकारी, पदाधिकारी आणि जबाबदार अधिकारी यांच्यावर कठोर कारवाई करावी, अशी मागणी बाळू टेंभुर्णे यांनी जिल्हाधिकाऱ्यांकडे केली आहे. यासोबतच संबंधित मनुष्यबळ पुरवठादार संस्थेचा करारही रद्द करण्यात यावा, अशी मागणी त्यांनी केली.