गडचिरोली,प्रतिनिधी :-
अखिल भारतीय ग्राहक पंचायत, जिल्हा गडचिरोली यांच्या वतीने ९ ऑगस्ट २०२६ रोजी मौजा पोरला येथे ग्राहक जनजागृती व सदस्य नोंदणी अभियान राबविण्यात आले. या अभियानाला शेतकरी व ग्रामस्थांचा उत्स्फूर्त प्रतिसाद मिळाला.
कार्यक्रमाला अखिल भारतीय ग्राहक पंचायत, गडचिरोलीचे जिल्हाध्यक्ष श्री. उदय धकाते, जिल्हा सचिव श्री. अरुण पोगळे, जिल्हा उपाध्यक्ष श्री. विजय साळवे तसेच कार्यकारिणी सदस्य श्री. बळवंत येवले उपस्थित होते.
यावेळी उपस्थित ग्रामस्थ व शेतकऱ्यांना ग्राहक संरक्षण कायदा, ग्राहकांचे हक्क, बाजारपेठेत होणारी फसवणूक आणि ग्राहक म्हणून तक्रार निवारणाचे अधिकार याबाबत मार्गदर्शन करण्यात आले. ग्राहकांनी कोणतीही वस्तू किंवा सेवा घेताना जागरूक राहून आपले हक्क जाणून घेणे आवश्यक असल्याचे पदाधिकाऱ्यांनी सांगितले.
कार्यक्रमाला सुमारे २० शेतकरी व ग्रामस्थ उपस्थित होते. यावेळी उपस्थितांनी दैनंदिन व्यवहारात ग्राहक म्हणून आपली फसवणूक होत असल्याचे मान्य करत, यापुढे ग्राहक कायद्याची माहिती घेऊन आपल्या हक्कांच्या संरक्षणासाठी सक्रियपणे कार्य करण्याचा निर्धार व्यक्त केला.
दरम्यान, कार्यक्रमात ग्राहक पंचायत सदस्य नोंदणी अभियान राबविण्यात आले. या अभियानालाही उपस्थितांकडून उत्स्फूर्त प्रतिसाद मिळाला. ग्रामीण भागातील नागरिकांमध्ये ग्राहक हक्कांविषयी जागृती निर्माण करण्यासाठी अशा प्रकारचे अभियान जिल्ह्यातील इतर गावांमध्येही राबविण्यात येणार असल्याचे यावेळी सांगण्यात आले.
“जागरूक ग्राहक हाच सक्षम ग्राहक” या संदेशातून ग्राहक चळवळ गावागावात पोहोचविण्याचा संकल्प यावेळी करण्यात आला.
महाभारत न्यूज चे वाचकांना आवाहन
