चामोर्शीत विभागीय मत्स्यव्यवसाय प्रशिक्षण केंद्राला मान्यता,आमदार डॉ. मिलिंद नरोटे यांच्या पाठपुराव्याला यश

गडचिरोली, प्रतिनिधी :-

गडचिरोली जिल्ह्यातील मत्स्यव्यवसायाला आधुनिक तंत्रज्ञान आणि कौशल्यविकासाची जोड देण्यासाठी चामोर्शी येथे विभागीय मत्स्यव्यवसाय प्रशिक्षण केंद्र स्थापन करण्यास शासनाने मान्यता दिली आहे. आमदार डॉ. मिलिंद नरोटे यांच्या पुढाकारामुळे आणि पाठपुराव्यामुळे या महत्त्वपूर्ण उपक्रमाला गती मिळाली असून, स्थानिक मच्छीमार, आदिवासी बांधव तसेच बेरोजगार युवकांना रोजगार व स्वयंरोजगाराच्या नव्या संधी उपलब्ध होणार आहेत.

मत्स्यव्यवसाय मंत्री नितेश राणे यांच्या अध्यक्षतेखाली मंत्रालयात झालेल्या बैठकीत या केंद्राच्या स्थापनेबाबत सविस्तर चर्चा झाली. यावेळी आमदार डॉ. मिलिंद नरोटे, मत्स्यव्यवसाय विभागाचे सचिव एन. रामास्वामी, मत्स्यव्यवसाय आयुक्त प्रेरणा देशभ्रतार तसेच संबंधित अधिकारी उपस्थित होते.

गडचिरोलीतील मत्स्यव्यवसायाची मोठी क्षमता लक्षात घेऊन आधुनिक प्रशिक्षण केंद्राची आवश्यकता आमदार डॉ. नरोटे यांनी बैठकीत मांडली. जिल्ह्यात मोठ्या प्रमाणात जलस्रोत उपलब्ध असून त्याचा प्रभावी वापर करून मत्स्य उत्पादन वाढविण्यासोबतच स्थानिक नागरिकांच्या उत्पन्नात वाढ करण्याची मोठी संधी आहे.

आमदार डॉ. नरोटे यांच्या प्रयत्नांना महत्त्वपूर्ण यश

गडचिरोली जिल्ह्यातील जलसंपत्तीचा अधिक प्रभावी वापर करून मत्स्यव्यवसायाला व्यावसायिक आणि आधुनिक स्वरूप देण्याच्या दृष्टीने हे प्रशिक्षण केंद्र महत्त्वपूर्ण ठरणार आहे. चामोर्शीत विभागीय मत्स्यव्यवसाय प्रशिक्षण केंद्राला मिळालेली मान्यता ही गडचिरोलीच्या मत्स्यव्यवसायाच्या विकासासाठी महत्त्वाची पायरी असून, आमदार डॉ. मिलिंद नरोटे यांच्या प्रयत्नांना मिळालेले महत्त्वपूर्ण यश मानले जात आहे.

गडचिरोली जिल्ह्यात जिल्हा परिषदेचे १ हजार ६४५ तलाव, २३ सिंचन तलाव आणि २ हजारांहून अधिक शेततळी असून, एकूण ६ हजार ५०० हेक्टरपेक्षा अधिक जलक्षेत्र मत्स्यपालनासाठी उपलब्ध आहे. मात्र, बहुतांश मच्छीमार अद्याप पारंपरिक पद्धतीने मत्स्यव्यवसाय करीत असल्याने त्यांना आधुनिक तंत्रज्ञानाचे प्रशिक्षण देण्याची गरज आहे.

प्रस्तावित प्रशिक्षण केंद्रामध्ये आधुनिक मत्स्यपालन, मत्स्यबीज उत्पादन, मत्स्यखाद्य व्यवस्थापन, जल व माती परीक्षण, मत्स्यरोग निदान, मत्स्यप्रक्रिया आणि पुनर्चक्रित जलसंवर्धन प्रणाली यासह विविध विषयांचे प्रशिक्षण देण्यात येणार आहे. प्रशिक्षणासाठी आधुनिक सभागृह, प्रयोगशाळा, मार्गदर्शन केंद्र, वसतिगृह तसेच लघु मत्स्यप्रक्रिया केंद्रासारख्या सुविधा उपलब्ध करून देण्याचे नियोजन आहे.

या केंद्रासाठी कनेरी येथील शासकीय दूध शीतकरण केंद्राच्या अखत्यारितील २.८९ हेक्टर विनावापर जमीन मत्स्यव्यवसाय विभागास उपलब्ध करून देण्यास शासनाने मान्यता दिली आहे. जागा हस्तांतरणाची प्रक्रिया तातडीने पूर्ण करण्याच्या सूचना देण्यात आल्या आहेत.

चामोर्शी हे विभागातील मध्यवर्ती ठिकाण असल्याने गडचिरोलीसह परिसरातील मच्छीमार, मत्स्यकास्तकार आणि युवकांना प्रशिक्षण घेणे सुलभ होणार आहे. या केंद्रामुळे मत्स्य उत्पादन वाढण्याबरोबरच स्थानिक मच्छीमारांचे उत्पन्न, युवकांसाठी रोजगार आणि स्वयंरोजगाराच्या संधी वाढण्यास मदत होणार आहे.