आपला जिल्हाताज्या घडामोडी
पेन्शनर्सचे २४ तासांचे धरणे आंदोलन; २९ सप्टेंबरपासून जिल्हाधिकारी कार्यालयासमोर ठिय्या
प्रलंबित मागण्यांकडे शासनाचे लक्ष वेधण्यासाठी महाराष्ट्र राज्य पेन्शनर्स संघटनेचा इशारा
गडचिरोली, प्रतिनिधी :-
निवृत्तिवेतनधारक, कुटुंब निवृत्तिवेतनधारक तसेच राज्य सरकारचे ज्येष्ठ नागरिक यांच्या विविध प्रलंबित मागण्यांकडे शासनाचे लक्ष वेधण्यासाठी महाराष्ट्र राज्य पेन्शनर्स संघटना, जिल्हा शाखा गडचिरोली यांच्या वतीने जिल्हाधिकारी कार्यालयासमोर २४ तासांचे धरणे (पडाव) आंदोलन करण्यात येणार आहे.
संघटनेने जिल्हाधिकाऱ्यांना दिलेल्या निवेदनानुसार, सोमवार, २९ सप्टेंबर २०२६ रोजी सकाळी १० वाजता आंदोलनाला सुरुवात होऊन बुधवार, ३० सप्टेंबर रोजी सकाळी १० वाजेपर्यंत हे आंदोलन सुरू राहणार आहे. अखिल भारतीय राज्य सरकारी पेन्शनर्स फेडरेशनच्या बॅनरखाली देशभरात विविध मागण्यांसाठी आंदोलन करण्यात येत असल्याचे निवेदनात नमूद करण्यात आले आहे.
गडचिरोली जिल्ह्यातील निवृत्तिवेतनधारक, कुटुंब निवृत्तिवेतनधारक आणि ज्येष्ठ नागरिकांनी मोठ्या संख्येने सहभागी होऊन आंदोलनाला पाठिंबा द्यावा, असे आवाहन संघटनेने केले आहे.
दरम्यान, देशभरातील पेन्शनर्स संघटनांकडून सप्टेंबरअखेर विविध टप्प्यांत आंदोलनांचे आयोजन केले जात असल्याचे वृत्त आहे.
निवेदनावर महाराष्ट्र राज्य पेन्शनर्स संघटनेचे गडचिरोली जिल्हाध्यक्ष विमल अंबाडकर, जिल्हा सचिव परवीन शेख आणि जिल्हा कोषाध्यक्ष कुंदा सलामे यांच्या स्वाक्षऱ्या आहेत.
“पेन्शनर्सच्या प्रलंबित प्रश्नांकडे शासनाचे लक्ष वेधण्यासाठी हे आंदोलन असून जिल्ह्यातील सर्व पेन्शनर्सनी सहभागी व्हावे,” असे आवाहन संघटनेच्या वतीने करण्यात आले आहे.
