पोर्लाजवळ एसटी बस-कारची जोरदार धडक

गडचिरोली, प्रतिनिधी :-

गडचिरोलीहून वडसाकडे जाणाऱ्या एसटी बसला चारचाकी कारने जोरदार धडक दिल्याची घटना आज शुक्रवार, दि. २५ सप्टेंबर रोजी सायंकाळी साडेपाच ते सहा वाजताच्या सुमारास पोर्ला गावाजवळ घडली. या अपघातात MH 31 GA 7863 क्रमांकाच्या कारच्या पुढील भागाचे मोठ्या प्रमाणात नुकसान झाले असून, एक जण गंभीर जखमी झाल्याची प्राथमिक माहिती आहे.

अपघातानंतर परिसरातील नागरिकांनी तत्काळ घटनास्थळी धाव घेत जखमींना मदत केली आणि त्यांना उपचारासाठी गडचिरोली येथील जिल्हा सामान्य रुग्णालयात दाखल करण्यात आले. त्यापैकी एका गंभीर जखमीला पुढील उपचारासाठी नागपूर येथे हलविण्यात आले आहे.

अपघातामुळे काही काळ वाहतुकीवर परिणाम झाला होता. मात्र, रस्त्याच्या एका बाजूने वाहतूक सुरळीत सुरू ठेवण्यात आली आहे.

काही दिवसांपूर्वीच एसटी बसचा भीषण अपघात

विशेष म्हणजे, काही दिवसांपूर्वीच गडचिरोली-चामोर्शी मार्गावर एसटी बसचा भीषण अपघात झाला होता. या अपघातात मोठ्या संख्येने प्रवासी जखमी झाले होते. त्यानंतर एसटी महामंडळाच्या बसची देखभाल, वाहनांची तांत्रिक तपासणी आणि प्रवाशांच्या सुरक्षिततेचा प्रश्न पुन्हा ऐरणीवर आला होता.

दरम्यान, मागील अपघातानंतर एसटी महामंडळाच्या अधिकाऱ्यांना अपघात टाळण्यासाठी आवश्यक ती खबरदारी घेण्याच्या सूचना करण्यात आल्या होत्या. असे असतानाच आज पोर्लाजवळ पुन्हा एसटी बसचा अपघात झाल्याने प्रवाशांच्या सुरक्षिततेबाबत नागरिकांकडून चिंता व्यक्त केली जात आहे.

एसटी महामंडळाने बसची नियमित तांत्रिक तपासणी, चालकांची सुरक्षितता आणि प्रवाशांच्या सुरक्षेसाठी आवश्यक उपाययोजना अधिक काटेकोरपणे राबवाव्यात, अशी मागणी नागरिकांकडून होत आहे.